तालूक्यातील चौगाण या साजाच्या महिला तलाठी चंदा ठाकरे यांना यंदाचा आदर्श तलाठी पुरस्कार जाहीर झालेला आहे. त्यांना हा पुरस्कार येत्या १ मे ला महाराष्ट्र दिनी चंद्रपूर जिल्हाधिकारी कार्यालयात मान्यवरांच्या उपस्थितीत (पाच हजार रुपयांचा धनादेश व प्रमाणपत्र देवून) सन्मानित करण्यात येणार आहे.
ब्रम्हपूरीच्या तहसीलदार उषा चौधरी व मंडळ अधिकारी नरेश बोधे यांचे मार्गदर्शनाखाली महिला तलाठी चंदा ठाकरे यांनी सन 2021-22 या वर्षात
मुदतपूर्व शासकीय वसुलीचे 100 टक्के उद्दीष्ट पूर्ण करून तब्बल 65 अतिक्रमण प्रकरणे शोधून नियमानुकुल करण्यास प्रस्ताव पाठवले व ती अतिक्रमणे नियमाकुल करण्यात आली. या शिवाय गरजू लाभार्थींना पट्टे मिळवून देण्यात त्यांची महत्वाची भूमिका राहिली आहे. एव्हढेच नाही तर शेतकरी व विद्यार्थी यांचे सोबत त्यांची नेहमीच सौजन्यपूर्वक वागणूक राहिली आहे. एक आदर्श महिला तलाठी म्हणून ब्रम्हपुरी तालुक्यात चंदा ठाकरे यांची ओळख आहे.