वाशिम : पर्यावरणाच्या अचानक बदलामुळे तापमानात अचानक वाढ होऊन प्रचंड उकाडा वाढलेला असून,त्यामुळे कारंजेकरांचे जनजीवन त्रस्त झाले आहे.भयंकर उन्हामुळे दुपारपूर्वीच १०:३० नंतर एकीकडे शहरातील रस्ते निर्मनुष्य होतांना दिसत आहेत.तर दुसरीकडे मात्र लग्नसराईकरीता बाजारपेठेत खरेदीला येणारे वऱ्हाडी मंडळी यांना खरेदी कशी करावी ? आणि निवडणूका असल्याने नेतेमंडळी यांना निवडणूकी करीता मतदाराच्या भेटीगाठी कशा घ्याव्यात ? असे प्रश्न निर्माण होतांना दिसत आहेत.आरोग्यातील बदलामुळे ताप, सर्दी, खोकला, गालफुगी सारखे आजार वाढल्याने रुग्नालयात मात्र रुग्नांची गर्दी वाढल्याचे चित्र दिसून येत आहे. तर उकाड्याने हैरान झालेले नागरिक पाण्याकरीता बिसलेरी बॉटल, थंडपेय व टरबूज खरबूज इ फळाची मागणी करतांना दिसत आहेत. या पाश्वभूमिवर आरोग्य विषयक जनजागृती करतांना दिव्यांग समाजसेवक संजय कडोळे यांनी नागरिकांना आवाहन करतांना म्हटले आहे की, शक्यतोवर भयंकर उन्हामध्ये बाहेर फिरणे टाळले पाहिजे. त्याऐवजी आपली बाहेरची कामे सकाळी किंवा सायंकाळी उरकून घ्यावी. उन्हाळ्या मध्ये सैल अशा सुती कापडाचा वापर करावा. उपाशी पोटी फिरू नये.डोक्याला उपरणे किंवा रुमाल व डोळ्याकरीता गॉगल वापरावा. उन्हापासून बचाव करण्यासाठी एखादा कांदा व भिमसेनी कापूर जवळ ठेवून त्याचा वास घ्यावा. उन्हातून आल्याबरोबर हळू हळू पाणी प्यावे. फ्रिजरचे व बिसलेरीचे पाणी पिण्यापेक्षा मातीच्या माठामधील पाणी घ्यावे. उन्हामध्ये अतिथंड पेय,टरबूज, खरबूज खाऊन लगेच उन्हात जाऊ नये. आरोग्याविषयी तक्रार असल्यास लगेच रुग्नालयात जाऊन,डॉक्टरांचा सल्ला घेऊनच औषधोपचार घ्यावा.
