मूल (चंद्रपूर) : नादुरूस्त बसच्या चाकासमोर दगड न लावल्याने झालेल्या अपघातात एका यांत्रिकी कामगाराचा मृत्यू झाला. ही घटना मूल बस स्थानकावर सोमवार, 16 मे रोजी दुपारच्या सुमारास घडली. राजू दांडेकर (रा. चंद्रपूर) असे मृत कामगाराचे नाव आहे.
गडचिरोलीवरून चंद्रपूरकडे जाणारी राज्य परिवहन महामंडळाच्या चंद्रपूर आगाराची बस (क्रमांक MH 14 HG 8243) मूल बस स्थानकावरून चंद्रपूरकडे रवाना होण्यासाठी निघाली असता प्रवेशव्दारावरील उतारावर अचानक ब्रेक नादुरूस्त झाले. हा यांत्रिक दोष निर्माण झाल्याने नादुरूस्त बसमधील प्रवाशांना दुसर्‍या प्रवासी बसने चंद्रपूरकडे रवाना करण्यात आले. त्यानंतर याबाबतची माहिती चंद्रपूर आगारात नोंदविण्यात आली. ती बस दुरूस्त करण्यासाठी चंद्रपूर आगारातून राजू दांडेकर हे यांत्रिकी कामगार मूल येथे आले. दुपारी 12.30 ते 1 वाजताच्यादरम्यान नादुरूस्त बसची पाहणी करून अडकलेले ब्रेक दुरूस्त करण्यासाठी ते बसखाली झोपले.
बसखाली झोपण्यापूर्वी त्यांनी किंवा बस चालकाने सुरक्षेचा उपाय म्हणून त्या बसच्या चाकासमोर दगड ठेवावयास पाहिजे होते. परंतु, तसे करण्यात आले नाही. बस दुरूस्त करीत असताना अडकलेले ब्रेक अचानक मोकळे झाल्याने उभी बस समोर सरकली. बस खाली झोपून दुरूस्तीचे काम करणार्‍या राजू दांडेकर यांच्या अंगावरून ती बस गेल्याने ते गंभीर जखमी झाले. एसटी कर्मचार्‍यांनी त्यांना येथील उपजिल्हा रूग्णालयात हलविले. परंतु, प्रकृती चिंताजनक असल्याने प्राथमिक उपचार करून पुढील उपचारासाठी चंद्रपूरला हलवित असताना वाटेतच त्याचा मृत्यू झाला. बसचालक रामचंद्र मेश्राम विरूध्द भादंवि 304 (अ) अन्वये गुन्हा दाखल करण्यात आला आहे. पुढील तपास ठाणेदार सतिशसिंह राजपुत यांचे मार्गदर्शनात मूल पोलिस करीत आहेत.
