कारंजा (लाड) : आपल्या भारतीय संस्कृतीमध्ये पितृपंधरवाड्यामध्ये आपल्या पूर्वजांचे स्मरण केल्या जाते, त्यांचे श्राद्ध केल्या जाते. या पक्षामध्ये विश्व मांगल्य सभेच्या कारंजा मधील कामाक्षा माता सदाचार सभा व शिवशक्ती सदाचार सभेतील महिलांनी स्वातंत्र्य सेनानी सुभाषचंद्र बोस यांना श्रद्धांजली अर्पण केली.
सदाचार सभा ही विश्वमांगल्य सभेची नित्य कार्यपद्धती आहे. या सभांतर्गत या पितृ-पंधरवाड्यात क्रांतिकारक, समाजसेवक,राष्ट्रप्रेमी थोर पुरुषांच्या पुतळ्या जवळील परिसर स्वच्छता करून, दीप प्रज्वलित करून पुतळ्यांना हारार्पण केले, तसेच त्यांच्या उदात्त जीवनाचे, त्यांच्या कार्याचे, त्यांचे देशाप्रती केलेले समर्पण, त्यागवृत्ती याचे स्मरण केल्या गेले.
दिनांक 14 सप्टेंबर रोजी विश्वमांगल्य सभेच्या शिवशक्ती सदाचार सभा आणि कामाक्षा माता सदाचार सभेतील कार्यकर्त्यांनी शहरातील सुभाष चंद्र बोस यांच्या पुतळ्याजवळील स्वच्छता केली. परिसर स्वच्छतेनंतर मान्यवरांच्या हस्ते दीप प्रज्वलन करून विश्वमांगल्य सभेच्या प्रतिमेला हारार्पण करण्यात येऊन शक्तिगानाने सभेला सुरुवात झाली. स्वातंत्र्य सेनानी सुभाषचंद्र बोस यांच्या जीवनावर कारंजा शाखेच्या उपाध्यक्षा श्रीमती वैशालीताई नंदे प्रकाश टाकला. त्यांच्या भाषणातून त्यांनी सुभाष चंद्र बोस यांचे ध्येय भारताला सशस्त्र संघर्षातून स्वातंत्र्य मिळवून देणे हेच होते आणि यापासून आपण शिकावे की आपल्या राष्ट्राकडे वक्र दृष्टीने बघणार्यांना आपण सशस्त्र लढाच द्यावा. तसेच सुभाष चंद्र बोस यांचे राष्ट्रप्रेम, समर्पण, त्याग, देशासाठी कार्य करण्याची तळमळ आणि मुख्य म्हणजे त्यासाठी स्वतः महत् कार्य केले. आपल्या भगवान श्रीकृष्णांनी भगवद्गीतेत सांगितल्या प्रमाणे "कर्मण्येवाधिकारस्ते मा फलेषु कदाचन। मा कर्मफलहेतुर्भूर्मा ते सङ्गोऽस्त्वकर्मणि।" स्वतःला काय मिळते हे न बघता आपण आपले कार्य करत रहावे, राष्ट्र सर्वातोपरि' मानले पाहिजे, हा उदात्त संदेश वैशालीताईंनी समाजासमोर मांडला. राष्ट्रगानाने या सभेची सांगता झाली.
दोन्ही सभेच्या कार्यकर्त्यांनी या आगळ्यावेगळ्या सभेसाठी अतिशय मेहनत घेतली. यावेळेस वाशिम जिल्हा सदाचार सभा संयोजका सोनाली लक्रस, कारंजा सदाचार सभा संयोजिका मनीषा जोशी, शितल काकडे , मेघा गुल्हाने , गायत्री पापडे, सोनल पापडे, एकता गायकवाड, प्रमिला जिरापुरे, शिला गुलवाडे, आचल कश्यप,पियुषा भोयर, प्रतीक्षा देसाई,मोना देशपांडे व इतरही कार्यकर्त्या उपस्थित होत्या.
याचप्रमाणे विविध सदाचार सभेच्या माध्यमातून कारंजा शहरातील छत्रपती शिवाजी महाराज, महात्मा ज्योतिबा फुले, लोकमान्य टिळक, भगतसिंग, राष्ट्रसंत गाडगेबाबा यासारख्या क्रांतिकारक, राष्ट्रप्रेमी, थोर पुरुष, समाज सेवक यांच्या पुतळ्यांचा परिसर स्वच्छ करून त्यांना श्रद्धांजली अर्पण केल्या जाणार आहे.
आपल्या प्रतिक्रिया द्या....
