गडचिरोली :-
सहकार क्षेत्रातील अत्यंत मानाचा समजल्या जाणाऱ्या महाराष्ट्र राज्य सहकारी पतसंस्था फेडरेशनचा राज्यस्तरीय " दिपस्तंभ पुरस्कार 2024" यावर्षी नागपूर विभागातून दि गडचिरोली नागरी सहकारी पतसंस्था मर्यादित गडचिरोली या पतसंस्थेला मिळाला असून सदर पुरस्कार नुकताच महाराष्ट्र राज्य पतसंस्था फेडरेशनचे अध्यक्ष काकासाहेब कोयटे यांचे शुभ हस्ते डॅनीसन्स रिसॉर्ट गोकर्ण महाबळेश्वर कुमठा कर्नाटक येथे दोन दिवशीय आंतरराज्य सहकार प्रशिक्षण व पुरस्कार वितरण सोहळ्यात पतसंस्थेला प्रदान करण्यात आला. यावेळी कर्नाटक राज्य सहकारी पतसंस्था फेडरेशनचे संचालक डॉ. संजय होसमट, कर्नाटकचे मा. खासदार प्रभाकर कोरे, मा. खासदार अण्णासाहेब जोले, कर्नाटकच्या आमदार सौ. शशिकला जोले,सेवानिवृत्त अप्पर निबंधक श्रीकृष्ण वाडेकर सहकारी पतसंस्था महाराष्ट्र राज्य पुणे आदी मंचावर उपस्थित होते. हा पुरस्कार संस्थेचे अध्यक्ष अनिल पाटील म्हशाखेत्री , मानद सचिव सुलोचना वाघरे, संचालक दिलीप उरकुडे, व शेषराव येलेकर आदींनी उपस्थित राहून स्वीकारलाआहे.
सहकार क्षेत्राला बळकटी मिळावी तसेच प्रामाणिक आणि चोख काम बजावणाऱ्या, सहकारी कायदे आणि नियमांची चौकट सांभाळून प्रगती साधणाऱ्या पतसंस्थांना "दीपस्तंभ" पुरस्काराने सन्मानित करण्यात येते. 100 कोटीपेक्षा जास्त ठेवी असणाऱ्या पतसंस्था गटातून गडचिरोली नागरी सहकारी पतसंस्थेला हा पुरस्कार मिळालेला आहे.
गेल्या 32 वर्षापासून संस्था ग्राहकांना सेवा देत आहे, संस्थेने दिलेल्या सेवेच्या तसेच पारदर्शक व्यवहारामुळे संपूर्ण गडचिरोली जिल्ह्यात ग्राहकांचा संस्थेवर प्रचंड विश्वास आहे. त्यामुळेच 31 मार्च 2025 च्या आर्थिक स्थितीनुसार पतसंस्थेने 126 कोटीचा ठेवीचा टप्पा गाठला आहे. संस्थेची गुंतवणूक 66.63 कोटी असून,101.93 कोटींचे कर्ज वाटप केले आहे. वसूल भाग भांडवल 5.81 कोटी असून राखीव निधी व इतर निधी 31.50 कोटी एवढा आहे.
सहकार क्षेत्रातील वाढत्या स्पर्धेत टिकून राहण्यासाठी संस्थेनेआधुनिक तंत्रज्ञानाचा स्वीकार केलेला आहे. संस्थेच्या गडचिरोली जिल्ह्यात नऊ शाखा असून त्या सीबीएस प्रणालीच्या माध्यमातून कार्यान्वित आहेत त्यामुळे संस्थेच्या ग्राहकाला कुठल्याही शाखेतून व्यवहार करण्याची सोय आहे तसेच कार्यालयाला सर्व शाखेचे व्यवहार व माहिती मिळणे सुलभ झाले आहे. मोबाईल बँकिंग ॲप, अभीकर्ता मोबाईल ॲप, RTGS/NEFT सुविधा, SMS सुविधा, संगणीकृत व्यवहार, सोनी तपासणी मशीन इत्यादी सुविधा संस्थेकडून पुरविल्या जातात. आज संस्थेचे 4833 सभासद संस्थेच्या सेवेचा लाभ घेत आहेत.
गडचिरोली सारख्या आदिवासी नक्षलग्रस्त भागात आर्थिक दृष्ट्या भक्कम, ठेवींना संपूर्ण संरक्षण, ग्राहकांचा प्रचंड विश्वास आणि सहकार खात्याच्या प्रत्येक निकषात तंतोतंत बसणारी दि गडचिरोली नागरी सहकारी पतसंस्था गडचिरोली ही सहकार क्षेत्रातील विश्वसनीय पतसंस्था म्हणून ओळखली जाते. यापूर्वी पतसंस्थेला सलग तीन वर्ष "बँको ब्ल्यू रिबन" पुरस्काराने सन्मानित करण्यात आले आहे. आणि यावर्षी पतसंस्थेला "दीपस्तंभ पुरस्काराने" सन्मानित करण्यात आल्याबद्दल पतसंस्थेचे अध्यक्ष अनिल पाटील म्हशाखेत्री, उपाध्यक्ष सुमतीताई मुनघाटे मानद सचिव सुलोचना वाघरे, संचालक पंडित पुडके, प्रा. मधुकर कोटगले, पवन मुनघाटे, दिलीप उरकुडे, प्रा शेषराव येलेकर, मुकुंद म्हशाखेत्री, दिलीप खेवले, किशोर मडावी, कृष्णा दुधे, संध्या खेवले, पांडुरंग चिलबुले व्यवस्थापक लिंगाजी मोरांडे भूषण रोहनकर सर्व शाखांचे व्यवस्थापक, कर्मचारी व सर्व ठेव अभीकर्त्यांचे अभिनंदन होत आहे.
आपल्या प्रतिक्रिया द्या....
.jpeg)