ग्रामीण विकासाचा संपूर्ण गाडा हाकण्याची जबाबदारी पंचायत समिती विभागाची आहे. मात्र सदोष कार्यप्रणाली व अधिकारी, कर्मचाऱ्यांच्या दिरंगाईच्या धोरणामुळे ग्रामीण नागरिकांना प्रचंड त्रास सहन करावा लागत असून अनेकांची कामे रेंगाळलेली असल्याची वस्तुस्थिती आज पंचायत समितीच्या आमसभेत निदर्शनास आली. विकासाचा गाडा हाकणाऱ्यांकडून कर्तव्यात तीळ मात्रही कुचराई नको अशी तंबी देत राज्याचे माजी कॅबिनेट मंत्री, आमदार विजय वडेट्टीवार यांनी अधिकारी व कर्मचाऱ्यांना चांगले धारेवर धरले. तर आयोजित आमसभेत पशुसंवर्धन व पंचायत विभागावर नागरिकांनी प्रचंड ताशेरे ओढले.
आज ब्रह्मपुरी येथील विठ्ठल रुक्मिणी सभागृहात पंचायत समितीची वार्षिक सर्वसाधारण सभा पार पडली.
सदर सभेस अध्यक्ष म्हणून राज्याचे माजी कॅबिनेट मंत्री, आमदार विजय वडेट्टीवार हे होते.
यावेळी सभेस तहसीलदार उषा चौधरी, गटविकास अधिकारी संजय पुरी, सहाय्यक गटविकास अधिकारी रविंद्र घुबडे, काॅंग्रेसचे तालुकाध्यक्ष खेमराज तिडके, माजी जि.प. सदस्य प्रमोद चिमूरकर, माजी जि.प.सदस्या स्मिताताई पारधी, माजी पं. स. सदस्य थानेश्वर कायरकर, महीला काँग्रेसच्या तालुकाध्यक्ष मंगलाताई लोनबले, सरपंच संघटनेचे तालुकाध्यक्ष सोनू नाकतोडे, सरपंच उमेश धोटे हे प्रामुख्याने यावेळी उपस्थित होते.
आयोजित वार्षिक साधारण सभेत मागील वर्ष सन 2021- 22 या आर्थिक वर्षाचा कार्य अहवाल वाचन करण्यात आला. सोबतच सन 2022-23 चा अहवाल सादर करताच विविध विभागाच्या कार्यप्रणालीवर दोषांचा ठपका ठेवत नागरिकांनी आमसभेत तक्रारींचे वादळ निर्माण केले. यावर सभाध्यक्ष माजी मंत्री, आमदार विजय वडेट्टीवार यांनी नागरिकांनी पशुसंवर्धन विभागाच्या कार्यप्रणाली बाबत उपस्थित केलेल्या प्रश्नावरून तसेच पंचायत विभागाच्या विकासकामा संदर्भातील अहवाला बाबत दिशाभूल करणारे अहवालपत्रक सादर केल्याने दोन्ही विभागाच्या अधिकाऱ्यांना चांगलेच धारेवर धरले. सोबतच नागरिकांच्या समस्या आठवडाभरात सोडवा अन्यथा कायदेशीर कठोर कारवाई करण्यात येईल अशी तंबी देखील दिली. ग्रामीण भागात विकासाचा दुवा म्हणून पंचायत समितीची यंत्रणा कार्यान्वित केलेली आहे. ही जबाबदारी पेलणाऱ्या प्रत्येक अधिकाऱ्याने ग्रामीण नागरिकांच्या अडचणी जाणून घेऊन सर्वतोपरी प्रयत्नातून विकासाचा गाडा हाकलत ग्रामीण भागाचा विकास साधावा. असे होत नसल्यास कर्तव्यात कसूर करणाऱ्या अधिकाऱ्यांवर कायदेशीर कारवाईतून त्यांना मिळणारे वेतन भत्तेही थांबवण्यात येतील अशा प्रकारच्या शब्दात माजी मंत्री, आमदार वडेट्टीवार यांनी अधिकारी व कर्मचाऱ्यांना खडसावले.
यावेळी ब्रह्मपुरी तालुक्यातील सरपंच, उपसरपंच, ग्रामपंचायत सदस्य, काँग्रेस पक्षाचे कार्यकर्ते, ग्रामसेवक व पंचायत समितीचे कर्मचारीवृंद यावेळी प्रामुख्याने उपस्थित होते.
पशुसंवर्धन विभागाचा निष्काळीपणा:-
ब्रह्मपुरी तालुक्यातील मेंडकी येथील शेतकरी मेघश्याम आंबोरकर यांची दुधाळू गाय पशुसंवर्धन विभागाच्या निष्काळजीपणाचा बळी ठरली. आज आमसभेत हे प्रकरण चांगलेच गाजले. तर शेतकरी मेघश्याम आंबोरकर यांनी प्रश्न उपस्थित केला असता पशुसंवर्धन विभागाच्या अधिकाऱ्यांची चांगलीच भंबेरी उडाली. यात मेंडकी येथील पशुसंवर्धन विभागाचे पर्यवेक्षक राजहंस मेश्राम यांच्यावर निष्काळजीपणा व कार्यप्रणालीवर ठपका ठेवत वेतनवाढ रोखण्याचे आदेश यावेळी सभाध्यक्ष आमदार विजय वडेट्टीवार यांनी दिले आहे.
आपल्या प्रतिक्रिया द्या....
.jpg)
