मुंबई /वाशिम (जिल्हा प्रतिनिधी संजय कडोळे) :ब्रिटनचे उप उच्चायुक्त हरजिंदर कांग यांनी आज मुख्यमंत्री एकनाथ शिंदे यांची सदिच्छा भेट घेतली. महाराष्ट्रात पर्यावरण,कृषी,पायाभूत सुविधा, आरोग्य,पर्यटन,शिक्षण,कृत्रिम बुद्धिमत्ता आदी क्षेत्रात गुंतवणुकीला मोठा वाव असल्याचे सांगत,थेट परकीय गुंतवणुकीत महाराष्ट्र देशात प्रथम क्रमांकावर असल्याचे मुख्यमंत्री एकनाथ शिंदे यांनी यावेळी सांगितले.
मुख्यमंत्र्याच्या वर्षा निवासस्थानी, दि 13 जुलै रोजी,कांग यांच्या नेतृत्वाखालील शिष्टमंडळाने मुख्यमंत्र्यांची भेट घेतली.शिष्टमंडळामध्ये जॉन निकेल,सचिन निकारगे यांचा समावेश होता.
मुख्यमंत्री एकनाथ शिंदे यावेळी म्हणाले की,गेल्या अनेक दशकांपासून महाराष्ट्र आणि ब्रिटनमध्ये वाणिज्यीक संबंध आहेत.ब्रिटन हा भारतातील मोठा गुंतवणूकदार असून त्यातील अनेक कंपन्या महाराष्ट्रात आहेत. गुंतवणुकीसाठी महाराष्ट्र हे सर्वाधिक प्राधान्यक्रम असलेले राज्य आहे.पर्यावरण,उत्पादन, शेती,पायाभूत सुविधा, आरोग्यसेवा,अक्षय ऊर्जा, जैवतंत्रज्ञान,कृत्रिम बुद्धिमत्ता, पर्यटन,औषधनिर्माण आणि शिक्षण या क्षेत्रात गुंतवणुकीच्या संधी असल्याचे मुख्यमंत्र्यांनी सांगितले.
ब्रिटनकडे या सर्व क्षेत्रांत जागतिक दर्जाचे प्रगत तंत्रज्ञान आहे. महाराष्ट्रात रस्ते, उत्तम पायाभूत सुविधा,कुशल मनुष्यबळ आहे.सकल राष्ट्रीय उत्पन्नात राज्याचे सर्वात मोठे योगदान असून थेट परकीय गुंतवणुकीत महाराष्ट्राचा सिंहाचा वाटा असल्याचे मुख्यमंत्र्यांनी सांगितले.
महाराष्ट्रात शिवराज्याभिषेक दिनाचा 350 वा वर्षसोहळा साजरा करण्यात येत आहे.ब्रिटनमधील वस्तूसंग्रहालयात असणारी, छत्रपती शिवरायांची,जगदंबा तलवार आणि वाघनखे महाराष्ट्रात आणण्यासंदर्भात सांस्कृतिक कार्य विभाग पाठपुरावा करीत आहे.त्याबाबत सखोल चर्चा करण्यात येवून,सहकार्य करण्याचे आवाहन यावेळी करण्यात आले. त्यामुळे विदेशातील संग्रहालयात धुळ खात असलेली छत्रपती शिवरायांची जगदंबा तलवार लवकरच महाराष्ट्रात आणण्याचा मार्ग मोकळा होण्याची आशा करायला हरकत नाही. यावेळी उद्योग विभागाचे प्रधान सचिव हर्षदीप कांबळे,विकास आयुक्त दीपेंद्रसिंह कुशवाह आदी अधिकारी उपस्थित यावेळी होते. असे वृत्त मिळाले आहे.
आपल्या प्रतिक्रिया द्या....
