कारंजा:-
श्रीक्षेत्र शेगावनिवासी "ब्रम्हांडनायक"संत गजानन महाराज यांचा प्रगटदिन केवळ महाराष्ट्रात, संपूर्ण भारतातच नव्हे तर अगदी जगभरात आनंद आणि उत्साहात साजरा केल्या जात असून, आजमितीला श्रीक्षेत्र शेगावनगरीतील श्रींचे संस्थान हे संपूर्ण जगभरातील मानव समाजाला माणुसकी,परोपकार,निःस्वार्थ,निष्काम कर्मयोगाची शिकवण देत असते.श्री शेगाव संस्थान येथील शांती,संयम व शिस्तीचे धडे घेऊन भाविक भक्त आप आपल्या गावी प्रसन्न मुद्रेने जात असतात.आणि त्यामुळे पावित्र्याचे प्रतिक असलेले श्री संत गजानन महाराजांचे मंदिर आपल्या गावात नव्हे नव्हे,आपल्या प्रत्येकाच्या मनात कायम असावे.म्हणून आज रोजी श्री गजानन भक्त परिवार आपआपल्या गावात, वसाहतीत निव्वळ मानवसेवेकरीता संत गजानन महाराज मंदिराचे निर्माण करून निःस्वार्थ मानवसेवेचा संदेश एकमेकांना देत असतात.अशाच कल्पनेतून कुण्यातरी श्री भक्ताला श्रींचा साक्षात्कार झाल्यामुळे अंदाजे पन्नास पंचावन्न वर्षांपूर्वी कारंजा येथील श्री कामाक्षादेवी मंदिरा समोर असलेल्या शहर पोलिस स्टेशन आवारातील श्री हनुमान मंदिराजवळ श्रींचे छोटेसे मंदिर बांधण्यात आले होते.पुढे महारांजाच्या अनुभूतिचा प्रत्यय श्री भक्तांना होत गेल्याने हळूहळू या मंदिरामध्ये भाविकांची वर्दळ वाढू लागली.त्यानंतर पोलिस निरिक्षक म्हणून नंदकिशोर काळे हे ठाणेदारपदी विराजमान झाल्या नंतर,भक्तजनांच्या इच्छेखातर श्रींच्या मंदिराचा जिर्णोध्दार होऊन,श्रींच्या मंदिरात श्रीक्षेत्र शेगाव प्रमाणेच सकाळची काकड आरती,नैवेद्यारती,सायंकाल आरती होऊ लागली.शिवाय दर गुरुवार आणि एकादशीला सायं. ०७ : ०० च्या आरतीनंतर भक्तजनांच्या पुढाकारातून अन्नदान व महाप्रसादाची प्रथा सुरु झाली.श्रींचे हे मंदिर कारंजा शहरात असणारे पहिले मंदिर असून प्राचिन आहे.
येथील मंदिराचे साक्षात्काराची प्रचिती अनेकांना आल्यामुळे पुढे तर श्री संत गजानन महाराजांचे जागृत संस्थान म्हणून या मंदिराची परिसरात प्रसिध्दी झाली. मंदिरातील श्रींची पवित्र मूर्ती प्रसन्नता,आनंद,व समाधान देणारी असल्यामुळे नुसत्या दर्शनाने श्रींच्या भक्तांना श्रीक्षेत्र शेगाव येथे आल्याचा प्रत्यय आणि आपल्यावरील ताण-तणाव-संकटे-चिंता-दुःखातू न मुक्त झाल्याची अनुभूती येऊ लागली. येथील सेवाधारी भक्त असलेले, सुरेशजी ठाकरे गुरुजी व इतरही सर्वच सेवाधारी मंडळी येथे तन मन धनाने स्वेच्छेने निःस्वार्थ सेवा देतअसतात. हे या मंदिराचे वैशिष्टय आहे. सालाबादप्रमाणे,श्रींच्या प्रगटदिना निमित्त सोमवार दि.१३ फेब्रुवारी रोजी प्रातःकाली ०५:०० वाजता,परंपरेप्रमाणे,कारंजा येथील पोलिस उपविभागीय अधिकारी जगदीश पांडे आणि कारंजा शहर पोलिस स्टेशनचे पोलिस निरिक्षक आधारसिह सोनोने यांचे शुभहस्ते श्रींचा महाभिषेक व महापूजा,सकाळी ०७:०० ते ८ : ३० पर्यंत श्री पिठाचे पूजन,श्री गणेश पूजन,नवग्रह पूजन,श्रींच्या पादुकांचे पूजन सकाळी ०८: ४५ ते ०९ : ३० पर्यंत होमहवन,श्रींच्या पालखीचे पूजन होईल.त्यानंतर सकाळी १० : १५ वाजता श्रींच्या मंदिरामधून,वर्षानुवर्षे चालत आलेल्या परंपरेप्रमाणे सालाबादनुसार कारंजा शहरातून नगर परिक्रमे करीता पालखीचे प्रस्थान होईल. सदर्हु श्रींची पालखी श्री मंदिरातून निघून, महाराणा प्रताप चौक, रामासावजी चौक,मारवाडीपूरा चौक,श्री शनि मंदिर चौक,श्री दत्त मंदिर चौक, मोठे श्रीराम मंदिर, श्रीराम व्यायाम शाळा चौक, टिळक चौक,जुन्या प्रभात टॉकीज मार्गे गांधी चौक,रामा सावजी चौक,चवरे चौक, कंकुबाई श्रविकाश्रम,जे डी चवरे विद्या मंदिर मार्गाने,हटोटीपूरा, छत्रपती संभाजी महाराज चौक, कुंभारपूरा श्री विठ्ठल मंदिर चौक, श्री गुरुमंदिर चौक, बाराभाऊ श्रीराम मंदिर चौक मार्गाने परत श्री मंदिरात पोहचेल.सदरहु पालखी मध्ये जय भवाणी जय मल्हार गोंधळी वारकरी मंडळ कारंजाचे (सेवाधारी दिंडी प्रमुख - संजय कडोळे यांच्या नेतृत्वात) विणेकरी हभप ओंकार महाराज मलवळकर,भालदार चोपदार हभप लोमेश पाटील चौधरी, हभप माणिक महाराज हांडे पाटील, प्रदिप वानखडे,उमेश अनासाने,साईबाबा पंजाबराव ठाकरे सेवारत राहतील. तसेच पालखी समोर श्री नागोराव ब्रॉस बॅन्ड पार्टी धनराज जोंधळे यांचे वाद्यसंगीत,रामेश्वर पाटील लाहे आंतरखेड यांचा आणि मतिनभाई यांचे नृत्य करणारे मानाचे (घोडे) दोन अश्व,श्रींच्या मुर्ति करीता गंगातिरकर यांचा रथ, श्री महर्षी वाल्मिकी महिला हरिपाठ भजनी मंडळ दिघी,श्री भजनी मंडळ खडी धामणी,श्री सखाराम बाबा (ढोल टाळ) भजनी मंडळ चोहोट्टा बाजार, श्री आसरा माता महिला मंडळ इंदिरा गांधी नगर कारंजा,जय गजानन भजन मंडळ शिवाजी नगर कारंजा,श्री तुळजा भवानी महिला मंडळ वाणीपूरा कारंजा आदी भजनी मंडळाच्या दिंड्या सहभागी होतील.दुपारी ०३ : ०० वाजता श्रींची पालखी मंदिरात पोहोचताच श्रींची महाआरती होऊन,सर्व दिंडी प्रमुख, भजनी मंडळाचा आणि मान्यवरांचा संस्थानकडून सन्मान होईल. सायंकाळी ठिक ०६ : ०० वाजता,श्री शेगाव संस्थानच्या मुळ प्रथेप्रमाणे,कारंजा शहर पोलीस स्टेशनच्या समोरील मुख्य प्रवेशद्वारा पासून, महाप्रसादाकरिता बारी (रांग) लागून,रांगेतच महाप्रसादाचे वितरण केले जाईल. श्रींच्या मंदिरात निष्काम व निःस्वार्थ सेवा देणारे सुरेश पाटील ठाकरे गुरुजी, गोपाल पुणेवार,शामरावजी नवघरे,गजानन पाटील कडू,राजू असलमोल,राजू चव्हाण श्रींच्या भक्तमंडळीसह पोलिस कर्मचारी सुद्धा त्यांच्या महाराजांवरील विश्वासाने व श्रध्देने अथक परिश्रम घेत आहेत.तरी शांतता, संयम व शिस्त ठेवून श्री भक्तांनी दर्शनाचा व महाप्रसादाचा हर्षोल्हासात लाभ घेण्याचे व श्री मंदिराचे पावित्र्य कायम राखण्याचे आवाहन संस्थानतर्फे करण्यात आले आहे.
आपल्या प्रतिक्रिया द्या....
.jpeg)
