गडचिरोली-चिमूर लोकसभा क्षेत्राचे खासदार तथा भाजपच्या अनुसूचित जमाती मोर्चाचे राष्ट्रीय महामंत्री अशोक नेते शनिवारी नागपूरवरून गडचिरोलीच्या दिशेने येत असतांना विहिरगावजवळ त्यांच्या वाहनाला अपघात झाला.
यात वाहनाचे थोडे नुकसान झाले असले तरी मात्र खासदार अशोक नेते सुखरूप आहेत. अपघातानंतर गडचिरोलीला आल्यानंतर ते अहेरी-सिरोंचाकडे पुढील दौर्‍यावर निघाले.
खासदार नेते मुंबईवरून रात्री 12.15 च्या सुमारास नागपूरला पोहोचल्यानंतर सकाळी ते आपल्या वाहनाने (एमएच 33, एए 9990) गडचिरोलीकडे निघाले होते. सकाळी 10.20 वाजताच्या सुमारास उमरेड मार्गावरील विहिरगावजवळ समोरच्या ट्रकने अचानक वळण घेतले. त्यामुळे त्या ट्रकला ओव्हरटेक करण्याच्या प्रयत्नात असलेल्या खासदार नेते यांच्या वाहनचालकाने वाहनावरील नियंत्रण सुटू न देता तातडीने ब्रेक लावले. मात्र त्या प्रयत्नात ट्रकच्या एका कॉर्नरला मागून हलकीशी धडक बसली. त्यात खासदार नेते यांच्या वाहनाचे नुकसान झाले. मात्र खासदार अशोक नेते यांच्यासह त्यांच्या वाहनातील कोणालाही दुख:पत झाली नाही. यानंतर दुसर्‍या वाहनाने खासदार अशोक नेते गडचिरोलीकडे निघाले. गडचिरोलीत पोहोचल्यानंतर ते आपल्या मतदार संघातील नियोजित दौर्‍यासाठीही रवाना झाले. दरम्यान, या अपघाताची माहिती मिळताच अनेकांनी खासदार नेते यांना फोन करून त्यांच्या प्रकृतीची चौकशी केली. ईश्‍वरी कृपेने कोणालाही दुखापत झालेली नाही, असे खासदासर नेते यांनी सांगितले.
