गोसेखुर्द धरणाच्या पाणलोट क्षेत्रात मोठ्या प्रमाणात पाऊस पडल्यामुळे गोसेखुर्द धरणातून मोठ्या प्रमाणात पाण्याचा विसर्ग करण्यात आल्याने वैनगंगा नदीला १५ ऑगस्ट ते १८ ऑगस्ट २०२२ रोजी पूर आला होता. पुराचे पाणी ब्रम्हपुरी तालुक्यातील नदीकाठावरील शेतांमध्ये शिरले होते. त्यामुळे शेतातील धानपीक, सोयाबीन, तुर व इतर पिकांचे मोठ्या प्रमाणात नुकसान झाले. पुरामुळे सुपिक शेतजमिनीवर कचरा व मातीचा थर मोठ्या प्रमाणात साचल्यामुळे खरीप हंगामाची दुबार पेरणी करीता त्या लागवडी युक्त राहिल्या नाहीत, परिणामी शेतकरी बांधव हतबल झाले आहेत.
त्यामुळे या शेतकरी बांधवांना धीर देण्यासाठी राज्याचे माजी कॅबिनेट मंत्री, आमदार विजय वडेट्टीवार यांनी ब्रम्हपुरी तालुक्यातील किन्ही, रूई, निलज, गांगलवाडी शेतशिवारातील शेतांच्या बांधावर जात नुकसानग्रस्त शेतीची पाहणी केली. नुकसानग्रस्त शेतकऱ्यांच्या शेतीचे तातडीने पंचनामे करण्याचे निर्देश सुध्दा त्यांनी यावेळी उपस्थित प्रशासनातील अधिका-यांना दिले.
ब्रम्हपुरी तालुक्यात २५ हजार हेक्टर जमीनीवर धान पिकाची लागवड केली होती. त्यापैकी १८ हजार हेक्टर वरील धानपिकाचे पुरामुळे नुकसान झाले आहे. शिंदे -फडणवीस सरकारने पूरामुळे नुकसान झालेल्या शेतकऱ्यांना महागाईच्या काळात हेक्टरी केवळ १३ हजार ६०० रुपये एवढा नाममात्र मदतीचा हात देऊन ३ हेक्टर ची मर्यादा ठेवत शेतकऱ्यांच्या तोंडाला पाने पुसली आहेत.
यंदाच्या वर्षी ब्रम्हपुरी तालुक्यात तिसऱ्यांदा पूर स्थिती उद्भवली आहे. पूराच्या पाण्यामुळे शेतातील संपूर्ण धान पीक नष्ट झाले आहे. शेतकऱ्यांनी शेती पिकविण्यासाठी घेतलेले सोसायट्यांचे पीक कर्ज कसे भरायचे असाही प्रश्न यानिमित्ताने शेतकऱ्यांपुढे उपस्थित झाला आहे. पुराच्या पाण्याखाली शेती आल्यामुळे शेतकऱ्यांची प्रचंड प्रमाणात नुकसान झाली आहे. शेतकऱ्याचे १०० टक्के नुकसान झाल्यामुळे शेतकऱ्यांचे पीक कर्ज माफ करावे, बियाणे, खते, कीटकनाशके, तणनाशके, ट्रॅक्टर भाडे आदी. महाग झाल्यामुळे महागाईच्या काळात पुरामुळे नुकसान भरपाई म्हणून शेतकऱ्यांना हेक्टरी ४० हजार रुपये अशी सरकारकडून भरीव मदत मिळावी, पुरामुळे हवालदिल झालेल्या शेतकऱ्यांना रब्बी हंगामात लागवडी साठी शासनाकडून मोफत बी - बियाणे देण्यात यावे, आदी मागण्या आपण सरकारकडे करणार असल्याची माहिती आमदार विजय वडेट्टीवार यांनी ब्रम्हपुरी येथे पार पडलेल्या पत्रकार परिषदेत पत्रकारांना दिली.
यावेळी तालुका काँग्रेस कमिटीचे अध्यक्ष खेमराज तिडके, तालुका काँग्रेस कमिटीचे कार्याध्यक्ष प्रभाकर सेलोकर, माजी जि.प. सदस्य प्रा.राजेश कांबळे, माजी जि.प. सदस्य प्रमोद चिमुरकर, माजी पं.स. सदस्य थानेश्वर कायरकर, नगरपरिषदेचे गटनेता विलास विखार, नगरसेवक डॉ. नितीन उराडे, महीला काँग्रेसच्या तालुकाध्यक्ष मंगलाताई लोनबले, यांसह काॅंग्रेसचे पदाधिकारी व शेतकरी बांधव मोठ्या संख्येने उपस्थित होते.
आपल्या प्रतिक्रिया द्या....
.jpeg)
