वाशिम, दि. 31 (जिल्हा प्रतिनिधी संजय क डोळे) : जिल्हयातील मातंग समाजाच्या अर्जदारांना स्वयंरोजगाराची संधी उपलब्ध करुन देण्यासाठी व समाजातील लोकांचे जीवनमान उंचावण्याकरीता राज्य शासनाने साहित्यरत्न लोकशाहीर अण्णाभाऊ साठे विकास महामंडळाची स्थापना केली आहे. याअंतर्गत मातंग समाजातील १२ पोट जातीतील लोकांना आर्थिक सहाय्य दिल्या जाते. चालु आर्थिक वर्षात बीजभांडवल योजनेअंतर्गत ५० हजार ते ७ लक्ष रुपयापर्यंत जिल्हयाला ३० कर्ज प्रकरणांचे उदीष्ट प्राप्त झाले असुन या मध्ये महामंडळाचा सहभाग ४५ टक्के अनुदानासह लाभार्थी सहभाग ५ टक्के आणि बॅकेचा कर्जाचा सहभाग ५० टक्के असतो. महामंडळाच्या बीजभांडवल रकमेवर ४ टक्के व्याज दर आकारण्यात येतो व बँकेच्या कर्ज रक्कमेवर बॅकेचा व्याज दर असतो.
या अनुदान योजनेअंतर्गत ५० रुपयापर्यंतचे कर्ज प्रस्ताव बँकेला पाठविण्यात येते. त्यामध्ये महामंडळाचे अनुदान १० हजार रुपये असून उर्वरित कर्ज बॅकेचे असते. या योजनेचे ४० कर्ज प्रकरणांचे उदीष्ट प्राप्त झाले आहे. या योजेनेचा लाभ घेण्यासाठी लाभार्थी हा मातंग समाज व त्यातील १२ पोटजातीतील असावा. वयोमर्यादा १८ते ५० असावी. जातीचा दाखला, उत्पनाचा दाखला, दोन फोटो, रेशन कार्ड, आधार कार्ड, घर टॅक्स पावती, कोटेशन, व्यवसायासाठी जागेचा पुरावा व प्रकल्प अहवाल आदी आवश्यक कागदपत्रांसह साहित्यरत्न लोकशाहीर अण्णाभाऊ साठे, विकास महामंडळ मर्या. डॉ.बाबासाहेब आंबेडकर सामाजिक न्याय भवन, चिखली रोड, वाशिम येथे कार्यालयीन वेळेत लाभार्थी स्वत: येऊन कर्ज प्रस्ताव सादर करावा. असे आवाहन लोकशाहीर अण्णाभाऊ साठे विकास महामंडळाचे जिल्हा व्यवस्थापक जे.एम.गाभणे यांनी केले आहे.
