अकोला:-
मोबाईलच्या विळख्यात अडकलेल्या देशाच्या युवा आधारस्तंभाना आजच्या अनाकलनीय सामाजिक परिस्थितीत सुरक्षित ठेवत सुसंस्कारीत पिढी घडविण्यासाठी बालपणापासूनच परिश्रम घेणे काळाची गरज असल्याचे भावनाशील प्रतिपादन अकोला वन विभागाच्या सहायक वन संरक्षक श्रीमती नम्रता ताले यांनी केले. पंचायत समिती अकोला अंतर्गत भौरद केंद्रातील जिल्हा परिषद वरिष्ठ प्राथमिक सेमी इंग्रजी शाळा, मोरगाव भाकरे येथे विद्यार्थी सहभागातून "एक पेड माँ के नाम" या अभिनव वृक्ष लागवड कार्यक्रमांतर्गत 'वृक्ष लागवड व दत्तक विधान' सोहळ्याचे प्रसंगी उपस्थित विद्यार्थी- विद्यार्थिनी तथा शिक्षक व पालक वृंदाला संबोधित करताना त्या बोलत होत्या. जिल्हा परिषद वरिष्ठ प्राथमिक सेमी इंग्रजी शाळा, मोरगाव भाकरेच्या प्रांगणात गावच्या प्रथम नागरिक सरपंच सौं. उमाताई माळी यांचे अध्यक्षतेत संपन्न झालेल्या या कालसुसंगत कार्यक्रमाचे प्रसंगी शाळा व्यवस्थापन समिती अध्यक्ष अनिल आगरकर, सदस्य पांडुरंग भाकरे, गावच्या उपसरपंच अर्चनाताई चोपडे, जिल्हा परिषद वरिष्ठ प्राथमिक शाळा मोरगाव भाकरेच्या उच्च श्रेणी मुख्याध्यापिका वनमाला चौके, सहायक शिक्षिका सौं.भावना अलकरी, सौं. लता गिते, सौं. नीता बिडवे, सौं. वैशाली कुलकर्णी, सौं. दर्शना सोनाग्रे, सौं. सरिता देवकाते आदींची विचारमंच्यावर उपस्थिती होती.
सशक्त समाज निर्मितीसाठी शालेय जीवनापासूनच सामाजिक दायित्वाची जाण होणे गरजेचे असल्याचे प्रतिपादित करताना नम्रता ताले यांनी मानवी जीवनात वृक्षांचे महत्व अतिशय साध्या सोप्या भाषेत विद्यार्थी आणि पालक वर्गाचे गळी उतरवत आज मिळालेले झाड प्रत्येक विद्यार्थ्याने आपल्या आईच्या ममतेने जोपासत त्याचा सांभाळ करावा व त्याचे संवर्धन करावे असे आवाहन केले व जिल्हा परिषद शाळेने या उपक्रमात सहभागी होत वृक्ष लागवड कार्यक्रमाचे आयोजन करून आपल्या दातृत्वाचा आणि समाजभानाचा परिचय करून दिला असल्याचे प्रशंसनीय प्रतिपादन देखील नम्रता ताले यांनी आपले मार्गदर्शनात केले व शाळा प्रशासनाचे आभार देखील व्यक्त केले.
जिल्हा परिषद वरिष्ठ प्राथमिक शाळा मोरगाव भाकरेच्या उपक्रमशील शिक्षिका सौ नीता बिडवे यांनी बदलत्या जागतिक हवामानाच्या परिस्थितीत दिवसे गणित वाढत जाणारे तापमान आणि त्याचा एकंदरीतच मानवी जीवनावर होणारा विपरीत परिणाम विषद करताना वसुंधरेचे संरक्षणासाठी मोठ्या प्रमाणात वृक्ष लागवड व जोपासना गरजेची असल्याचे सांगितले व त्याच भावनेतून शिक्षक म्हणून कर्तव्यपूर्तीचा एक भाग म्हणजेच आजचा "एक पेड मा के नाम" हा वृक्ष लागवड उपक्रम असल्याचे उपस्थितांना अवगत केले व विद्यार्थ्यांनी आपले गाव आत्मनिर्भर करण्यासाठी प्रयत्नांची पराकाष्टा करण्याचे आवाहन देखील आपल्या प्रस्ताविकात केले. याप्रसंगी शाळेमधील सर्व विद्यार्थी -विद्यार्थिनींना त्यांच्या पालकांसह प्रत्येकी एक झाड दत्तक देऊन त्याची जोपासना व संवर्धन करण्याची प्रतिज्ञा देण्यात आली. याप्रसंगी अमलतास,कडूनिंब, कडू बदाम, बेल, वड, पिंपळ, आवळा आदी वृक्षांची रोपे गावकऱ्यांनी आवडीने स्वीकारत त्यांची लागवड व जोपासना करण्याचे आश्वासन आयोजकांना दिले.
कार्यक्रमाचे सूत्रसंचालन सहाय्यक शिक्षिका सौं.नीता बिडवे यांनी केले तर सौ भावना अलकरी यांनी उपस्थित यांचे आभार मानले. कार्यक्रमाचे यशस्वी आयोजनासाठी जिल्हा परिषद वरिष्ठ प्राथमिक शाळा मोरगाव भाकरेच्या उच्च श्रेणी मुख्याध्यापिका सौं.वनमाला चौके, सहायक शिक्षिका सौं.भावना अलकरी, सौं. लता गिते, सौं. नीता बिडवे, सौं. वैशाली कुलकर्णी, सौं. दर्शना सोनाग्रे, सौं. सरिता देवकाते आदिनी अथक परिश्रम घेतले.
आपल्या प्रतिक्रिया द्या....
