राहत्या घरी मोहफुलाची दारू बाळगून तिची विक्री करणाऱ्या आरोपीवर गुन्हा सिद्ध झाल्याने चामोर्शी न्यायालयाने त्याला तीन वर्षे सश्रम कारावास व २५ हजार रुपये दंडाची शिक्षा ठोठावली. नारायण मुकुंदो मंडल (४८, रा. विष्णूपूर) असे शिक्षा झालेल्याचे नाव आहे. चामोर्शी तालुक्याच्या विष्णूपूर येथील नारायण मुकुंदो मंडल हा राहत्या घरातून अवैधरित्या मोहफूल दारूविक्रीचा व्यवसाय करत होता. त्याच्या अवैध व्यवसायाबाबत चामोर्शी पोलिस ठाण्याला माहिती मिळाली की, त्याने आपल्या घरी अवैधरित्या दारू बाळगली आहे. त्यानुसार चामोर्शी येथील पोलिस हवालदार राजू उराडे यांनी विष्णूपूर गाठून पंचांसह आरोपीच्या घरी जाऊन त्याच्या घराची झडती घेतली. तेव्हा आरोपीच्या राहत्या घरी एकूण १०० लिटर मोहफुलाची दारू आढळली. पोलिसांनी पंचनामा करून आरोपीविरुद्ध चामोर्शी पोलिस ठाण्यात गुन्ह्याची नोंद करून तपास केला व प्रकरण चामोर्शी येथील न्यायालयात वर्ग केले. सरकारी पक्षाच्या साक्षपुराव्यावरून आरोपीनेअवैधरित्या १०० लिटर दारू बाळगल्याचे निष्पन्न झाले. त्यानुसार प्रथमश्रेणी न्यायदंडाधिकारी एन. डी. मेश्राम यांनी आरोपीला तीन वर्षांचा सश्रम कारावास व २५ हजार रुपये दंडाची शिक्षा ठोठावली. या प्रकरणात सरकारी पक्षातर्फे अॅड. डी. व्ही. दोनाडकर यांनी काम पाहिले.
.jpeg)
.jpeg)
