वाशिम (जिल्हा प्रतिनिधी संजय कडोळे) : स्टैंड अप इंडिया योजनेत धनगर समाजातील महिलांकरीता मार्जिन मनी योजना सुरू करण्यात आली आहे. केंद्र शासनाने यासाठी १० हजार कोटी रुपयांची तरतूद केली आहे. ही रक्कम लघु उद्योग विकास बँकेकडे वर्ग करण्यात आली आहे. या बँकेने रकमेचे सुरक्षा हमी कवच तयार केले आहे. लाभार्थ्याना जे कर्ज दिले जाईल त्याला हमी देईल. या योजनेंतर्गत राज्यातील धनगर समाजातील महिलांनी १० टक्के स्वहिस्सा भरणा केल्यानंतर व बँकेने अर्जदारास स्टैंड अप इंडिया योजनेअंतर्गत ७५ टक्के कर्ज मंजूर केल्यानंतर उर्वरित १५ टक्के रक्कम राज्य शासनामार्फत देण्यात येणार आहे. याबाबतचा शासन निर्णय शासनाच्या www.maharashtra.gov.in या संकेतस्थळांवर निरिक्षणासाठी उपलब्ध आहे. या योजनेकरीता इच्छुक लाभार्थ्यांनी सर्व अटी व शर्तीची पुर्तता करून प्रस्ताव सहाय्यक आयुक्त, समाज कल्याण कार्यालय, वाशिम यांचेकडे सादर करावा. असे समाज कल्याणचे सहायक आयुक्त मारोती वाठ यांनी कळविले आहे.
