चंद्रपूर : येथील जिल्हा कारागृहात कार्यरत असलेल्या जिल्हा कारागृह अधीक्षकाने गळफास घेऊन आत्महत्येचा प्रयत्न केल्याची धक्कादायक घटना मंगळवारी रात्रीच्या सुमारास उघडकीस आली. या घटनेने कारागृह पोलीस प्रशासनात एकच खळबळ उडाली आहे. महेश माळी असे कारागृह अधीक्षकांचे नाव आहे.
चंद्रपुरातील जिल्हा कारागृहात अधीक्षक महेश माळी हे कार्यरत आहेत. मंगळवारी रात्रीच्या सुमारास त्यांनी कारागृह परिसरातच गळफास घेऊन जिवनयात्रा संपविण्याचा प्रयत्न केला. घटनेची माहिती कारागृहातील काही कर्मचाऱ्यांना होताच त्यांनी घटनास्थळाकडे धाव घेतली. यामुळे कारागृह अधीक्षकांचा आत्महत्येचा प्रसंग टाळला. मात्र, या घटनेने कारागृह पोलीस प्रशासनात एकच खळबळ उडाली आहे. कारागृह अधीक्षकांनी आत्महत्येचा प्रयत्न का केला? याविषयी अद्याप ठोस माहिती पुढे आलेली नाही. या घटनेविषयी पोलिसांनी तपास सुरू केला आहे.
