चंद्रपूर जिल्ह्यात जादूटोण्यातून वन्यप्राण्याची शिकार करून शेतात हाडे पुरल्याचा धक्कादायक प्रकार घडला होता. गुन्हा करून कोरचीत नातेवाइकाकडे दडून बसलेल्या पिता-पुत्रास १९ मे रोजी वनविभागाच्या पथकाने अटक केली.
अतुल मुरलीधर गायकवाड (33), मुरलीधर हरबाजी गायकवाड (६४, दोघे रा. शिवणी, ता. सिंदेवाही जि. चंद्रपूर) अशी आरोपींची नावे आहेत. ३ एप्रिल २०१३ रोजी शिवणी येथे जादूटोण्यातून त्यांनी वन्यप्राण्याची शिकार करून शेतात त्याची हाडे लपवल्याची कुणकुण चंद्रपूरच्या शिवणी वनपरिक्षेत्र अधिकाऱ्यांना लागली होती. त्यावरून वनपरिक्षेत्र अधिकारी बी. के. तुपे यांनी शेतात व घरी छापा मारून हाडे जप्त केली. ही हाडे तपासणीसाठी प्रयोगशाळेत पाठवली असून, भारतीय वन्यजीव संरक्षण अधिनियम १९७२ नुसार दोघांवर गुन्हा नोंद करण्यात आला.तेव्हापासून ते दोघे फरार होते. ते कोरची तालुक्यातील सोनपूर येथे नातेवाइकांकडे असल्याची माहिती वनविभागाला मिळाली. त्यानुसार, शिवणी वनपरिक्षेत्र अधिकारी तुपे यांनी क्षेत्र सहायक एस. वाय. बुल्ले, वनरक्षक एल. के. मेश्राम, ए. डब्लू, गायकवाड, एस. जी. चाहदे यांच्यासह कोरची गाठले.देसाईगंजचे उपवनसंरक्षक धर्मवीर सालविठ्ठल, सहायक वनसंरक्षक मनोज चौहान यांच्या मार्गदर्शनाखाली बेडगाव वनपरिक्षेत्र अधिकारी एल. एम. ठाकरे, क्षेत्र सहायक संजय राठोड, वनरक्षक प्रकाश मगरे, विलास रंनदये यांनी सापळा रचून प्रकाश बोगा यांच्या घरातून दोघांनाही ताब्यात घेतले.
.jpeg)
