भगवानदास खेमवानी हे अफलातून नेतृत्व. सिंधी समाजाचे असणाऱ्या भगवान खेमवानी यांचा स्वभावच मुळात हास्यमुख,मनमिळाऊ, प्रामाणिक,हजरजवाबी, कार्यतत्पर व विश्वासू होता.नगर पालिकेच्या सेवेत त्यांनी जवळ जवळ सर्वच विभागात कार्यरत असतांना, इमाने इतबारे व एकनिष्ठेने आपली सेवा दिली व ही सेवा देत असतांना कारंजेकर नागरीक मग तो कोणत्याही जाती धर्माचा असो, त्याचे काम पूर्ण करून समाजाची सेवा दिली.आपले सेवेतील कर्तव्य बजावीत असतांनाच त्यांना धार्मिक आणि आध्यात्मीक विषयाची ओढ लावून ते सत्संगात सहभागी होऊ लागले. विशेष म्हणजे ते आध्यात्मीक विषयाचे एवढे व्यासंगी झाले की त्यांची छाप तत्कालीन मुख्याधिकारी राठोड सर आणि इतर कर्मचारी यांचेवर पडली आणि अख्खी नगर पालीका कर्मचारी यांनाच त्यांनी धार्मिक व आध्यात्मिक मार्गाकडे वळवून,त्यांची सभोवतालच्या समाजाविषयी आस्था वळवून जनता जनार्दनांची अनेक कामे मार्गे लावली.त्यांनी नोकरीतील बढ़ती नंतर विद्युत निरीक्षक पदावर काम करीत असतांना रस्तोरस्ती,गल्लोगल्ली स्ट्रिट लाईट लावून संपूर्ण शहर प्रकाशाने उजळून टाकले होते. विशेष म्हणजे नोकरीत कार्यरत असतांना त्यांनी सिंधी समाजाच्या समाज बांधवा पासून तर नगर पालीका कर्मचारी आणि शहरातील इतर लोकांना सोबत जुळवून 'कारंजा ते पंढरपूर' येथील पायदळ वारी सुरू केली जी आजतागायत सुरू आहे. पंढरपूर येथेच त्यांची प्रवचन कला पाहून त्यांना हरी भक्त परायण ही उपाधी मिळाली.
त्यानंतर त्यांनी कारंजा ते शेगाव, कारंजा ते धामणगाव, कारंजा ते कुरणखेड,कारंजा ते धामणगाव आणि कारंजा ते माहूर पदयात्रा सुरु करून मार्गातील ग्रामस्थांना, निःस्वार्थ मानवसेवेचा संदेश देण्याचे बहुमोल काम केले. आज रोजी सेवानिवृत्ती नंतर तर त्यांनी प्रत्येक धार्मिक व आध्यात्मिक कार्यात आपली रुची वाढवून त्या दृष्टीने पाऊल टाकून कार्याची व्याप्ती वाढवीली त्यामुळे कारंजा गावातच नव्हे तर खेडोपोडी,उंबर्डा बाजार येथील संत गजानन महाराज मंदिराच्या उत्सवात त्यांना निमंत्रित करण्यात येत असते. व हभप भगवान खेमवानी सुद्धा उत्सवात तन-मन-धनाने सहभागी होऊन सेवा देत असतात.आज ते सिंधी समाज पंचायतचे उपमुखिया असून समाजात त्यांच्या कडून मार्गदर्शन घेतल्या जात असते. अशा हभप भगवान खेमवानी यांना दिपावली निमित्त खूप खूप शुभेच्छा ! *लेखक : संजय कडोळे, (महाराष्ट्र शासन पुरस्कार प्राप्त) अध्यक्ष : विदर्भ लोककलावंत संघटना, कारंजा (लाड) जि. वाशीम .*
