अकोला –
स्थानिक स्वराज्य संस्थांच्या निवडणुका जवळ येत असताना राजकारणात पुन्हा एकदा ‘पैसा विरुद्ध कार्य’ हा जुना पण धगधगता प्रश्न डोके वर काढताना दिसत आहे. गावागावांत वर्षानुवर्षे लोकांच्या सुखदुःखात सहभागी होणारे, संकटात धावून जाणारे, निर्भिड सामाजिक कार्यकर्ते बाजूला पडतात .तर पैसा, दिखावा आणि गटबाजी यांच्या बळावर उभे राहिलेले उमेदवार विजयी होतात, ही विसंगती आता उघडपणे जाणवू लागली आहे.
“पैसा असेल तरच निवडणूक लढवायची का? समाजासाठी झटणाऱ्यांना पाठिंबा न देण्याची मानसिकता का?” असा परखड सवाल समाजसेवक गजानन हरणे यांनी उपस्थित केला आहे.
प्रचार खर्चाचे ओझे, आणि सामाजिक कार्यकर्त्यांचा मार्ग कठीण.आज निवडणुका खर्चिकच नव्हे तर अवाजवी खर्चिक बनल्या आहेत. प्रचारासाठी गाड्या, पोस्टर-बॅनर, जेवणावळी, गटांना खुश करण्याचे कार्यक्रम, माणसे फिरवणे या सर्वासाठी लाखोंचा खर्च होतो. ज्यांच्याकडे आर्थिक पाठबळ नाही, असे सामाजिक कार्यकर्ते सुरुवातीपासूनच स्पर्धेबाहेर ढकलले जातात.हेच कार्यकर्ते वर्षानुवर्षे गावातील समस्या सोडवतात, लोकांच्या अडचणीत उभे राहतात, पण मतदानाच्या वेळी मतदारांच्या शब्दांत फक्त,“तो माणूस चांगला आहे. पण मत देऊ तिकडेच!”इतकीच दखल घेतली जाते. खरे कार्य बाजूला पडते, आणि पैसा व गटबाजी केंद्रस्थानी येते.पैसा वाटणारे उमेदवार जनतेसाठी नव्हे स्वतःसाठी गुंतवणूक करतात असे गजानन हरणे पुढे म्हणतात“मतदारांनी विचार करण्याची गरज आहे. निवडणुकीत पैसा वाटणारे उमेदवार लोकांसाठी नव्हे तर स्वतःच्या फायद्यासाठी गुंतवणूक करतात आणि नंतर ती अनेक पटींनी वसूल करतात, ही कटू वस्तुस्थिती आहे.”मतदारांनी जर सजग न राहता पैशावर किंवा तात्पुरत्या लाभावर आधारित मतदान केले, तर त्याचे परिणाम विकासकामांवर, गावाच्या प्रगतीवर आणि पारदर्शकतेवर अपरिहार्यपणे उमटतात. लोकशाहीत मतदार राजा आहे; परंतु राजानेच जर आपले मत किमतीवर विकत दिले, तर खरी लोकशाही टिकेल कशी?
पक्षासाठी सतरंज्या उचलणाऱ्यांना तिकीट मिळत नाही .हीच शोकांतिका
अनेक निष्ठावंत कार्यकर्ते आपल्या गावात, मतदारसंघात मेहनतीने काम करून विश्वास कमावतात. पण तिकीट वाटपाच्या वेळी चित्र पूर्ण बदलते.गटबाजी, आर्थिक ताकद, वरच्या पातळीवरील शिफारसी आणि राजकीय सौदे यांच्यापुढे जमिनीवर काम करणाऱ्या कार्यकर्त्यांची निष्ठा तुच्छ ठरते.“आपण तर आपलेच आहात!” या एका वाक्यात त्या कार्यकर्त्यांची चलती केली जाते. वर्षानुवर्षे सभा गाजवणारे, पोस्टर लावणारे, लोकांमध्ये प्रचार करणारे आणि पक्षाचा मानमरातब सांभाळणारे सैनिक निर्णायक क्षणी उपेक्षित राहतात.हे वास्तव बदलले पाहिजे, असे हरणे ठामपणे सांगतात.मतदारांनी मानसिकता बदलली तरच खऱ्या कार्यकर्त्यांचा उदय
या सर्व विसंगतीचे मुळ मतदारांच्या निर्णयप्रक्रियेतच असल्याचे समाजसेवक गजानन हरणे मानतात.
मतदारांनी पैशाच्या आकर्षणापेक्षा विकासाला, प्रामाणिकपणाला आणि सेवाभावाला प्राधान्य दिले, तर खऱ्या समाजसेवकांना उभारी मिळू शकते.“लोकांनी विचारपूर्वक मतदान केले, तर पैशांचा खेळ थांबेल व कार्यकर्त्यांना न्याय मिळेल,” असे आवाहन त्यांनी केले.
बदल मतदारांच्या हातात आहे
निवडणूक हा केवळ राजकीय उत्सव नाही; ती गावाच्या भवितव्याची दिशा ठरवणारी प्रक्रिया आहे.जर मतदारांनीच पैशावर आधारित राजकारणाला पाठबळ दिले, तर भ्रष्टाचार, गैरव्यवहार आणि विकासाची घसरलेली गती यासाठी जबाबदार कोण?
उत्तर सोपे आहे . आपण, म्हणजेच मतदारच.
म्हणूनच सामाजिक कार्यकर्त्यांच्या हक्काच्या लढ्याला आणि प्रामाणिक राजकारणाला पाठिंबा देण्यासाठी मतदारांनी जागरूक व्हावे, हीच खरी वेळ असल्याचे प्रतिपादन समाजसेवक गजानन हरणे यांनी जागृत मतदारांना, नागरिकांना प्रसिद्धी पत्रकाद्वारे केले आहे.
आपल्या प्रतिक्रिया द्या....
