राजुरा वनपरिक्षेत्रांतर्गत नियतक्षेत्र खांबाळा येथे अवैधरित्या वृक्षतोड करणाऱ्या दोन आरोपींना दुचाकी व साग आणि सीसम प्रजातीचे लाकडी वनोपज असा सुमारे 75 हजार रुपयांच्या मुद्देमालासह वन कर्मचाऱ्यांनी अटक केली आहे.
खांबाळा नियत क्षेत्रातील कक्ष क्रमांक 178 मध्ये गस्त करतांना दोन इसम अवैधरित्या वृक्षतोड करून मोटार सायकलद्वारे वाहतूक करीत असल्याचे वन कर्मचाऱ्यास निदर्शनास आले. त्यांना मोटार सायकलसह ताब्यात घेऊन आरोपीं विरुद्ध वन गन्हा नोंदविण्यात आला. आरोपी सुनील हजारे ( 41 ) व प्रभाकर टेकाम ( 67 ) दोन्ही रा. खांबाळा यांना अटक करण्यात आली. आरोपीच्या घराची वन कर्मचाऱ्यांनी तपासणी केली असता त्यांच्या घरातून अवैधरित्या साठवलेला सिसम आणि साग प्रजातीचे वनोपज व ईतर साहित्य जप्त करण्यात आले. सोबत दुचाकी जप्त करण्यात आली. सुमारे 75 हजार रुपयांचा मुद्देमालासह या दोन आरोपींना अटक करण्यात आली.ही कारवाई मुख्य वनसंरक्षक श्वेता बोड्डु, सहायक वनसंरक्षक श्रीकांत पवार यांचे मार्गदर्शनात वनपरिक्षेत्र अधिकारी सुरेश येलकेवाड, क्षेत्र सहायक संतोष संगमवार, वनरक्षक डी. एम. चंदेल, एन. ए. पोले, वर्षा वाघ, मीरा राठोड, संजय सुरवसे, सायस हाके व वनमजुर यांनी केली. बऱ्याच दिवसांच्या प्रयत्नानंतर हे आरोपी वनविभागाच्या जाळ्यात अडकले आहेत.
.jpg)
