कारंजा :- महाविकास आघाडीने उमेद्वारी पासून लोकनेते सुनिल पाटील धाबेकर यांना डावलून ऐनवेळी त्यांच्यावर अन्याय केल्यामुळे महाविकास आघाडीच्या सर्वच जाती धर्मातील स्थानिक कार्यकर्त्यामध्ये आणि लोकनेते सुनिल पाटील धाबेकर मित्र मंडळामध्ये आपल्यावर आपल्याच पक्षश्रेष्ठींनी अन्याय केला असल्याची भावना निर्माण झाली. म्हणून कारंजा मानोरा विधानसभा मतदार संघातील स्थानिकचे नेते आणि कार्यकर्ते तसेच धाबेकर समर्थकांनी सुनिल भाऊ धाबेकर यांना निवडणूक लढविण्याचा आग्रह धरून त्यांनी आपला उमेद्वारी अर्ज दाखल करावा अशी मागणी केली.त्यामुळे अखेर आपल्या सर्वधर्मिय समर्थक कार्यकर्त्याच्या विनंतीला मान देऊन सुनिल पाटील धाबेकर यांनी आज दि. 28 ऑक्टोंबर रोजी आपली अपक्ष उमेद्वारी दाखल केली. या प्रसंगी हजारो कार्यकर्त्याचा गोतावळा असलेला प्रचंड जनसमुदाय योजनामहर्षी स्व. बाबासाहेब धाबेकर सभागृह येथे गोळा झाला होता. त्यांनी कारंजा शहरातील प्रमुख मार्गाने वाजत गाजत उमेद्वार सुनिल पाटील धाबेकर यांना हजारो जनसमुदायाच्या सहभागाने उपविभागीय कार्यालय तहसील मैदान येथे नेले. उपविभागीय कार्यालय कारंजा येथे जात असतांना मार्गात श्री.विठ्ठल रखुमाई मंदिर येथे सुनिल पाटील धाबेकर यांनी दर्शन घेऊन माऊलीचे आशिर्वाद घेतले.तसेच पुढे जात असतांना ठिकठिकाणी स्वराज्य संस्थापक छत्रपती राजे शिवाजी महाराज, क्रांतिकारक शहिद भगतसिंग, व सर्व महापुरुषांच्या प्रतिमेला हारार्पण करीत सुनिल पाटील धाबेकर जनसमुदाया सोबत उपविभागीय कार्यालय कारंजा येथे पोहोचले. व त्यांनी आपली उमेद्वारी दाखल केली. यावेळी त्यांना मिळालेला जनता जनार्दनांचा उत्स्फूर्त प्रतिसाद पाहून कारंजेकरांना सन 1994 मध्ये योजनामहर्षी स्व.बाबासाहेब धाबेकर यांनी नारळाचे झाड या निवडणूक चिन्हावर लढविलेल्या निवडणूकीची आठवण झाली. व यावेळी यंदा त्या निवडणूकीची पुनरावृत्ती निश्चितच होणार असल्याचा विश्वास अनेकांनी बोलून दाखवीला. म्हणून यंदाची निवडणूक चुरशीची होणार असल्याचे स्पष्ट झाले. याप्रसंगी कारंजा मानोरा विधानसभा मतदार संघातील सर्वच जातीधर्म समाजाचे प्रमुख नेते, कार्यकर्ते आणि मतदारांची लक्षणीय उपस्थिती दिसून येत होती. असे वृत्त आमचे प्रतिनिधी प्रदिप वानखडे यांनी कळवीले आहे.
