कारंजा : ब्रम्हांडनायक श्री संत गजानन महाराज संस्थान शेगाव हे आपल्या नि:स्वार्थ, परोपकारी,सेवाभावी उपक्रमामुळे केवळ भारतातच नव्हे तर जगभरात "आदर्श संस्थान" म्हणून ओळखले जाते. संपूर्ण जगभरात श्रींचे लाखो करोडो भक्तजन असून गावोगावी ठिक ठिकाणी श्रींचा प्रगट दिनोत्सव प्रचंड आनंदोत्साहात साजरा करण्यात येत असतो. आपल्या कारंजा शहरात सुद्धा प्रत्येक वसाहतीत ठिक ठिकाणी श्रींची लहान मोठी शेकडो मंदिरे असून अनेक ठिकाणी श्रीमद्भागवत कथा, भजन,किर्तन, अन्नदान महाप्रसादाचे कार्यक्रम आयोजित करण्यात आले असून, अनेक ठिकाणी दिंडी मिरवणूक पालखी सोहळे सुध्दा निघणार आहेत. गेल्या दोन वर्षभर लागू असलेल्या कोरोना नियमावली मधून आपण सुखरुपपणे बाहेर पडल्यामुळे, साहजिकच यंदा भाविक भक्तांचा उत्साह जास्त दिसत आहे. त्या पार्श्वभूमिवर श्री संत गजानन महाराज प्रगट दिना निमित्त कारंजा शहर पोलिस स्टेशनचे पोलिस निरिक्षक आधारसिंह सोनोने यांनी समस्त कारंजेकर श्री भक्तांना शुभेच्छा दिल्या असून, श्रींच्या सर्व भाविक भक्तांनी आणि कारंजेकरांनी श्रींचा उत्सव श्रीक्षेत्र शेगाव संस्थानचे अनुकरण करूनच, शांतता, संयम व शिस्त ठेवून आणि महत्वाचे म्हणजे शासनाच्या निर्देशाचे व कायद्याचे भान ठेवून , निष्काम कर्मयोगी व सेवाधारी राहूनच आपला, आपल्या संस्थानचा, आपल्या कारंजा शहराचा नावलौकिक कायम ठेवण्याचे आवाहन केले आहे. असे वृत्त महाराष्ट्र राज्यस्तरिय पत्रकार परिषदेचे अध्यक्ष संजय कडोळे यांनी कळवीले आहे.
