रिसोड ( शहर प्रतिनिधी ) दि. 5 जुलै 2025: महाराष्ट्र शिक्षक अभियोग्यता व बुद्धिमत्ता चाचणी (TAIT) 2025 चा निकाल जाहीर होण्यास विलंब होत असल्याने लाखो उमेदवारांमध्ये अस्वस्थता आणि चिंता वाढत आहे. 27 मे ते 5 जून 2025 दरम्यान घेण्यात आलेल्या या परीक्षेचा निकाल अद्याप जाहीर झालेला नाही. 5 जुलै 2025 पर्यंत कोणतीही अधिकृत अपडेट नसल्याने विद्यार्थ्यांमध्ये संभ्रम आणि तणाव वाढला आहे. यात भर म्हणून, महाराष्ट्र राज्य परीक्षा परिषद (MSCE) कोणत्याही ई-मेल किंवा फोन कॉलला प्रतिसाद देत नसल्याने आणि प्रत्यक्ष चौकशीसाठी गेलेल्या विद्यार्थ्यांना ठोस उत्तरे न मिळाल्याने उमेदवारांमध्ये संशय आणि असंतोष वाढत आहे.
महाराष्ट्र राज्य परीक्षा परिषद (MSCE), पुणे यांच्याकडून या वर्षी सुमारे 2 लाख उमेदवारांनी TAIT 2025 परीक्षा दिली होती. मागील वर्षी (2023) मध्ये 22 फेब्रुवारी ते 3 मार्च दरम्यान झालेल्या TAIT परीक्षेचा निकाल 24 मार्च 2023 रोजी, म्हणजेच 21 दिवसांत जाहीर झाला होता. यंदा मात्र, परीक्षा संपल्यानंतर 30 दिवसांहून अधिक कालावधी लोटला तरी निकालाबाबत कोणतीही स्पष्टता नाही.
विद्यार्थ्यांना ठोस उत्तरांचा अभाव: अनेक उमेदवारांनी MSCE शी ई-मेल आणि फोनद्वारे संपर्क साधण्याचा प्रयत्न केला, परंतु त्यांना कोणताही प्रतिसाद मिळाला नाही. तसेच, काही उमेदवारांनी प्रत्यक्षपणे MSCE च्या पुणे कार्यालयात चौकशीसाठी भेट दिली असता, त्यांना निकालाबाबत कोणतीही ठोस माहिती देण्यात आली नाही. यामुळे उमेदवारांमध्ये संशय आणि अनिश्चितता निर्माण झाली आहे. एका उमेदवाराने नाव न सांगण्याच्या अटीवर सांगितले, "MSCE कडून स्पष्ट माहिती मिळत नसल्याने आमच्या मनात शंका निर्माण होत आहेत. निकाल प्रक्रियेत पारदर्शकतेचा अभाव वाटतो."
अफवांचा बाजार गरम: निकालाबाबत सोशल मीडियावर आणि इतर माध्यमांमध्ये अनेक अफवा पसरत आहेत. काहींच्या मते, तांत्रिक अडचणींमुळे निकालास विलंब होत आहे, तर काहींनी निकाल जुलैच्या दुसऱ्या आठवड्यात जाहीर होईल असा दावा केला आहे. या अफवांमुळे उमेदवारांमध्ये गोंधळ वाढला असून, अनेकजण आपल्या करिअर नियोजनाबाबत चिंतेत आहेत.
विद्यार्थ्यांचे मत : पुण्यातील उमेदवार स्नेहा पाटील म्हणाल्या, "निकालाच्या प्रतीक्षेमुळे आमच्या भविष्याच्या नियोजनावर परिणाम होत आहे. MSCE ने आमच्या ई-मेल आणि फोन कॉल्सना उत्तर द्यावे आणि लवकरात लवकर निकाल जाहीर करावा." नाशिक येथील राहुल जाधव यांनी सांगितले, "पवित्र पोर्टलवर नोंदणी आणि शिक्षक भरती प्रक्रियेला वेळ लागतो. निकाल लवकर जाहीर झाला तर आम्हाला पुढील पायऱ्यांची तयारी करता येईल. पण MSCE चा गैरजबाबदार वृत्तीमुळे आम्ही हतबल झालो आहोत."
मागणी: MSCE ने तातडीने पारदर्शकपणे निकाल प्रक्रियेबाबत माहिती द्यावी, उमेदवारांच्या ई-मेल आणि फोन कॉल्सना प्रतिसाद द्यावा आणि निकालाची निश्चित तारीख असलेले परिपत्रक जारी करावे, अशी उमेदवारांची मागणी आहे.
आपल्या प्रतिक्रिया द्या....
