पंधरवाड्यापासून भद्रावती तालुक्यातील अंधारात असलेली गावे खासदार बाळू धानोरकरांच्या मध्यस्थीने पुन्हा प्रकाशली आहेत. देयक न भरल्यामुळे पथदिव्यांचा विद्यूत पुरवठा खंडीत करण्यात आला होता. त्यामुळे गावकरी प्रचंड त्रस्त झाले होते. सरपंच संघटनांनी हा प्रश्न खासदार धानोरकरांकडे नेला. त्यांनी तो दोन तासात सोडविला. त्यामुळे भद्रावती-वरोरा मतदार संघातील शेकडो गावांतील नागरिकांनी सुटकेचा निःश्वास घेतला आहे. गावे प्रकाशमय झाली आहेत.
ग्रामपंचायतींनी पथदिव्यांचे वीज बिल भरले नाही. त्यामुळे मागील पंधरवाड्यापासून वीज वितरण कंपनीने पथदिव्यांचा विद्यूत पुरवइा खंडीत केला होता. गावे अंधारात आली होती. भद्रावती-वरोरा मतदार संघातील बहुतांश गावे जंगलव्याप्त आहे. त्यामुळे हिंस्त्र श्वापदांचा नेहमीच येथे वावर असतो. त्यांचे उन्हाळ्याच्या दिवसात आगमन होते. पाळीव जनावरांसोबत माणसांना लक्ष करतात. तसेच सध्या शेतीचा हंगाम सुरु आहे. त्यामुळे शेतकऱ्यांना रात्री-अपरात्री शेतात जावे लागते. त्यामुळे पथदिव्यांचा विद्यूत पुरवठा खंडीत केला जावू नये याकरिता भद्रावती-वरोरा मतदार संघातील शेकडो ग्रामपंचायतीनी वीज वितरण कंपनीकडे केली होती.
तसेच देयक अदा करण्यासाठी मुदत वाढ द्या, दोन वर्ष कोरोनामुळे ग्राम पंचायतींचा कर जमा झालेला नाही. त्यामुळे ग्रामपंचायतची आर्थिक डबघाईस आली आहे, आदी विविध कारणे वीज वितरण कंपनीला सांगण्यात आले. परंतु ते ऐकण्याच्या मनस्थितीत नसल्याने तालुका सरपंच संघटनेने गुरुवारपासून बेमुदत उपोषण सुरु केले होते.
दरम्यान खासदार धानोरकर यांची सरपंच संघटनेने काल शुक्रवारला भेट घेतली. त्यानंतर स्वतः खासदार बाळू धानोरकर वीज वितरणच्या कार्यालयात पोहचले. थकीत वीज देयक अदा करण्यासाठी ग्रामपंचायला वेळ द्या, अशी विनंती त्यांनी केली. मात्र वीज वितरण कंपनीचे अधिकारी ऐकायला तयार नव्हते. त्यामुळे धानोरकरांना संताप अनावर झाला. शेकडो गाव अंधारात असताना अधिकाऱ्यांची बेपर्वाईने त्यांचा संयम सुटला. शेवटी त्यांनी धानोरकर स्टाईल वापरली. जोपर्यंत पथदिव्यांचा प्रश्न सुटणार नाही. तोपर्यंत एकाही वीज वितरण कंपनीच्या अधिकाऱ्याला कार्यालयाबाहेर बाहेर जावू देणार नाही, असा दम दिला. दरम्यान ऊर्जामंत्री नितीन राऊत, जिल्हाधिकारी अजय गुल्हाने, मुख्य कार्यकारी अधिकारी जिल्हा परिषद चंद्रपूर मिताली शेट्टी यांच्याशी त्यांनी भ्रमणध्वनीवर संपर्क साधला आणि गावकऱ्यांना होणाऱ्या त्रासाची कल्पना दिली. तेव्हा नितीन राऊत यांनी पथदिव्यांची वीज कापला जाणार नाही, असे आश्वास खासदार धानोरकरांना दिले. मात्र त्याने खासदारांचे समाधान झाले नाही. शेवटी ऊर्जामंत्री नितीन राऊत यांनी लेखी आदेश पाठविले. पुढील निर्देश येईपर्यंत वीज कापू नये. ग्रामपंचायतला देयक अदा करण्यासाठी वेळ द्या, असे लेखी आदेश त्यांना अधिकाऱ्यांना दिले. त्यानंतर धानोरकर यांनी अधिकाऱ्यांना कार्यालय बाहेर जावू दिले. त्यानंतर सरपंच संघटनेने उपोषण मागे घेतले. धानोरकरांच्या स्टाईलने शेतकरी वीज कपातीच्या जाचातून मुक्त झाले. गावा पुन्हा प्रकाशमय झाल्याने गावकरी समाधान व्यक्त केले आहे.
शेतीचा हंगाम सुरु आहे. रात्री-अपरात्री शेतकऱ्यांना शेतात जावे लागते. हिेंस्त्रप्राणी गावापर्यंत पोहचलेले आहे. अशा परिस्थितीत पथदिव्यांची वीज कापणे योग्य नाही. ग्रामपंचायती वीज देयक अदा करण्यासाठी वेळ द्यायला हवा. आमच्या शेतकऱ्यांवर वीज वितरण कंपनीचा विश्वास नाही काय, हे समाजावून सांगण्यासाठी मला आपली स्टाईल वापरावी लागली आणि दोन तासास प्रश्न निकाली निघाला.
