वाशिम : जिल्हा परिषदेच्या पशुसंवर्धन विभागामार्फत सन 2023-24 वर्षासाठी वैयक्तिक लाभाच्या योजनांसाठी लाभार्थ्यांकडून ऑनलाईन पध्दतीने अर्ज मागविण्यात येत आहे. अर्ज करण्याकरीता https://ah.mahabms.com हे संकेतस्थळ आणि गुगल प्ले स्टोअरवरील AH.MAHABMS हे मोबाईल ॲप उपलब्ध करुन देण्यात आले आहे. अर्ज फक्त ऑनलाईन पध्दतीनेच स्विकारले जाणार आहे. तसेच लाभार्थ्यांची निवडसुध्दा ऑनलाईन पध्दतीनेच होणार आहे. तरी लाभार्थ्यांनी 9 नोव्हेंबर ते 8 डिसेंबर या कालावधीत ऑनलाईन पध्दतीने अर्ज करावे.
विशेष घटक योजनेअंतर्गत अनुसूचित जाती/ नवबौध्द लाभार्थ्यांना व आदिवासी उपयोनजेअंतर्गत आदिवासी क्षेत्राबाहेरील आदिवासी लाभार्थ्यांना 75 टक्के अनुदानावर दोन दुधाळ जनावरांचा पुरवठा करणे. यामध्ये लाभार्थ्याची निवड झाल्यास एक महिन्याच्या आत 25 टक्के लाभार्थी हिस्सा 44 हजार 814 रुपये धनाकर्षाव्दारे भरावा लागेल. निवड झालेल्या या योजनेत अनुदान प्राप्त झाल्यानंतर पात्र लाभार्थ्यांना दोन दुधाळ जनावरे, कृषी उत्पन्न बाजार समितीमधील गुरांच्या बाजारातून खरेदी करुन देण्यात येतील.
विशेष घटक योजनेअंतर्गत अनुसूचित जाती/ नवबौध्द लाभार्थ्यांना व आदिवासी उपयोजनेअंतर्गत आदिवासी क्षेत्राबाहेरील आदिवासी लाभार्थ्यांना 75 टक्के अनुदानावर 10+1 शेळी गटाचा पुरवठा करण्यात येईल. यामध्ये लाभार्थ्याची निवड झाल्यास एका महिन्याच्या आत उस्मानाबादी/संगमनेरी जातीसाठी 25 हजार 886 रुपये व स्थानिक जातीसाठी 19 हजार 558 रुपये लाभार्थी हिस्सा धनाकर्षाव्दारे भरावा लागेल. शेळी गटाची खरेदी ही प्राधान्याने पुण्यश्लोक अहिल्यादेवी मेंढी व शेळी महाराष्ट्र महामंडळाकडून करण्यात येईल.
तरी या योजनांचा संबंधित घटकातील गरजू लाभार्थ्यांनी लाभ घ्यावा. असे आवाहन कृषी व पशुसंवर्धन समिती सभापती वैभव सरनाईक व जिल्हा पशुसंवर्धन अधिकारी डॉ. डी.व्ही. देशमुख यांनी केले आहे.
