चंद्रपूर : लग्नाचा आदल्या दिवशी हळदीचा कार्यक्रम असते. उद्या लग्न सोहळा होणार होता. वर-वधू मंडळी उत्साहात होती. मात्र हळदीचा दिवशी अचानक भावी नवरदेव गायब झाला. मोबाईल नाॕट रिचेबल येत होता. आता येईल, आता येईल म्हणता म्हणता बराच वेळ निघून गेला. अखेर कुटूंबियानी पोलीस स्टेशन गाठून तक्रार दिली. हा प्रकार जिल्ह्यातील वरोरा येथे घडला.
वधू - वराकडील मंडळींनी विवाहाच्या निमंत्रण पत्रिका वाटल्या. रीतिरिवाजाप्रमाणे विवाह ठरला. साक्षगंधही झाले. वर - वधूकडे पाहुणे मंडळी जमली. 21 ऑगस्ट विवाहाचा दिवस होता. 20 ऑगस्ट रोजी नवरदेवाला हळद लावण्याची तयारी झाली. त्याच दिवशी दुपारी बाराच्या सुमारास दाढी करण्याकरिता नवरा मुलगा घराबाहेर पडला.
मात्र, तो घरी पोहोचला नाही. बराच वेळ लोटल्यानंतरही तो परत आला नाही. घरच्यांनी त्याचा शोध घेणे सुरू केले. भ्रमणध्वनीवर संपर्क केला असता तो "नॉट रिचेबलं" येत होता. विवाहाचा दिवस येऊनही नवरदेव प्रतिसाद देत नसल्याने वधू मंडळी नवरदेवाचा घरी पोहचली. त्यांना सगळा प्रकार कळला. यामुळे त्यांना चांगला धक्का बसला. अखेर पोलीस स्टेशन गाठून नवरदेव बेपत्ता झाल्याची तक्रार देण्यात आली आहे.
