जत तालुक्यातील बाज येथील तरुण भारतचे पत्रकार नाना गडदे यांना मारहाण करणारे माजी सरपंच संजय आनंदा गडदे व त्याचे साथीदार अशोक बिरू गडदे , विकास बंडगर या तिघांना* जत येथील प्रथमवर्ग न्यायदंडाधिकारी यांनी न्यायालयीन कोठडी सुनावली आहे. आता त्यामुळे सर्व संशयित आरोपींची रवानगी कोल्हापूर येथील कळंबा मध्यवर्ती कारागृहामध्ये करण्यात आली आहे.
यामुळे पत्रकारांना मारहाण करणार्‍यांना पत्रकार संरक्षण कायद्याचा जबरदस्त दणका बसला आहे. जतचे कर्तव्यदक्ष उपविभागीय पोलीस अधिकारी रत्नाकर नवले यांनी संशयित आरोपींना 14 दिवसांची न्यायालयीन कोठडी मागितली होती. सहाय्यक सरकारी वकील जे जे पाटील यांनीही संशयितांना जामीन मंजूर करू नये अशी मागणी केली. त्यानुसार जतचे प्रथमवर्ग न्यायदंडाधिकारी मा. अ.भा. जाधव यांनी आरोपींची न्यायालयीन कोठडीत रवानगी केली आहे.
दरम्यान,आरोपींच्या वकिलाने जामीनासाठी विनंती अर्ज केला आहे. सदर अर्जावर मंगळवारी सुनावणी ठेवण्यात आली आहे. तोपर्यंत तिघाही संशयितांची कळंबा मध्यवर्ती कारागृहात रवानगी करण्यात आली आहे.
पत्रकारावर हात उचलणे व लोकशाहीच्या चौथ्या स्तंभाचा अवमान करणाऱ्यांना अनेक दिवस जेलची हवा खावी लागणार हे आता स्पष्ट झाले आहे. त्यामुळे यापुढे पत्रकारांवर हल्ले करण्याच्या प्रकाराला निश्चितच पायबंद बसणार आहेत.
मारहाणीच्या घटनेचा जत तालुक्यातील सर्वच पत्रकार बांधवांनी तीव्र निषेध व्यक्त करत आरोपीवर कारवाईची मागणी करा अन्यथा आंदोलन करण्याचा इशारा दिला होता. पोलीस प्रशासनाने योग्य पावले उचलत आरोपीला गजाआड करत योग्य शासन देण्याचा विडा उचलला आहे. जत तालुक्यात पत्रकारांच्या अनेक संघटना असल्या तरी पत्रकार हाच आत्मा मानून सर्वांनी एकदिलाने ही लढाई लढण्याचा निर्धार केला. पत्रकार संघाने लढाईस पुढाकार घेतला त्यास पत्रकार परिषद व श्रमिक पत्रकार संघाने खंबीर पाठींबा दिला व जतच्याच नव्हे तर राज्याच्या पत्रकार क्षेत्रात एक वेगळा आदर्श निर्माण करत पहिल्या टप्प्यात अर्धी लढाई जिंकली आहे, उर्वरित लढाईही यशस्वी होईल यात शंका नाही. पत्रकारांच्या एकीमुळे एक नवा इतिहास पत्रकार क्षेत्रात घडला.
.jpeg)
